Þetta smásagnasafn Matthíasar Johannessens hefur að geyma 22 sögur sem áður komu út árið 1995. Flestar eru sögurnar stuttar og hnitmiðaðar lýsingar sem fanga forvitnileg augnablik eða hugsun, nema fyrsta sagan, Hvar er nú fóturinn minn, þar sem segir af hvunndagshetjunni Absalon. Mætti heldur flokka hana sem hálfgildings nóvellu.

Sögur Matthíasar hafa sterk höfundareinkenni. Þær eru afar persónulegar en um leið svo almennar að þær skírskota til sameiginlegrar reynslu okkar allra. Mikið er um trúarlegar vísanir og þær endurspegla tíðarandann svo vel að það er eins og við þekkjum flestar persónurnar sem þar birtast. Frábærar sögur sem allir geta haft gaman að.